متلازمة بنات دول مجلس التعاون الخليجي

لا ده ما مرض. ولا أقول لكم حاجة؟ حالة، وحالة مرضية كمان

معظم بناتنا السودانيات اللي إتربو في الخليج بيعانوا من المتلازمة دي. والأعراض كالتالي:
1- الدلع الفائض واللي بيتمثل في مجموعة من امراض أخرى سمها صديق لي بأمراض الدلع (كالجلد الحساس، المعدة الحساسة، الأزمة، الأنيميا، وغيرهم)

2-الطلبات و التوقعات الغير واقعية من الوالدين، الأخوة، والعجب من "الجكس" يعني ما ممكن يا بنات الناس تكونوا دايرين أي حاجة شوفتوها مرة واحدة في مسلسل أسترالي عرضوه في قناة الشارقة، خصوصاً لو المطلوب منه عايش في قارة تانية.

3- حب السيطرة: وبالعامية كده "فاكنها في روحم" لي يعني معظم بنات الخليج مقتنعات إنهم بنات كول وراقيات وفاهمات في كل شي في الدنيا وبالتالي بيظنوا إنهم أدرى وأي زول يتجرأ يناقش النقطة دي ولا أي من النقاط المذكورة أعلاه بياخد على راسو وبيعيش ليهو في مسلسل خليجي اللي الأحداث فيهو بتجر أيام طويلة وبيكون فيهو لغة مشفرة ما بيفهما الطرف الثاني لأنو البنت ذاتا ما فاهمها وبتكون بتواصل فيها بس عشان المسلسل ما يخلص

أفتكر كده كفاية
ومن دون زعل لأني بس بحاول أعمل نقد ذاتي :-)